महामारी विज्ञान तथा रोग नियन्त्रण महाशाखाले डेंगु रोगको संक्रमण देशभर तीव्र रुपमा बढिरहेको चेतावनी दिएको छ। महाशाखाका अनुसार सन् २०२५ को जनवरी महिनादेखि अहिलेसम्म ७३ जिल्लामा डेंगुको १,६७३ जना संक्रमित फेला परिसकेका छन्।
स्वास्थ्य विशेषज्ञहरूले आगामी तीन महिनाभित्र यदि तत्काल रोकथाम र नियन्त्रणका प्रभावकारी उपायहरू अवलम्बन नगरिए, ६०,००० भन्दा बढी मानिसहरू डेंगु रोगबाट प्रभावित हुनसक्ने प्रक्षेपण गरेका छन्।
महाशाखाले स्थानीय तह र सम्बन्धित निकायहरूलाई सचेत रहन र जनस्वास्थ्यका सुरक्षात्मक कदमहरू चाँडै लागू गर्न आग्रह गरेको छ। यसअन्तर्गत लामखुट्टेको बासस्थान हटाउने, घर वरिपरि पानी जम्न नदिने, झुल र मच्छरदानी प्रयोग गर्ने तथा डेंगुको प्रारम्भिक लक्षण देखिएमा तुरुन्त स्वास्थ्य संस्थामा सम्पर्क राख्न सर्वसाधारणलाई अनुरोध गरिएको छ।
डेंगु ज्वरो, टाउको दुख्ने, जोर्नी दुख्ने, शरीरमा डाबर आउनेजस्ता लक्षणबाट सुरु हुन्छ र गम्भीर अवस्थामा ज्यानसमेत जोखिममा पर्न सक्छ। यसकारण स्वास्थ्य मन्त्रालयले आम नागरिकलाई विशेष सावधानी अपनाउन अपिल गरेको छ।