प्रधानमन्त्री केपी शर्मा ओली आज बिहान काठमाडौँबाट २१ सदस्यीय उच्चस्तरीय प्रतिनिधिमण्डलसहित स्पेन प्रस्थान गरेका छन्। उहाँले सेभिलमा आयोजना हुने संयुक्त राष्ट्रसंघको चौथो अन्तर्राष्ट्रिय सम्मेलन विकासका लागि वित्तीय स्रोत व्यवस्थापन (UN’s Fourth International Conference on Financing for Development) मा नेपालको तर्फबाट सहभागिता जनाउने कार्यक्रम रहेको छ।
प्रधानमन्त्री ओलीको यो भ्रमणको क्रममा उहाँले स्पेनका प्रधानमन्त्रीसँग दुईपक्षीय भेटवार्ता गर्नुका साथै विविध अन्तर्राष्ट्रिय कार्यक्रम, सम्मेलन र छलफलहरूमा सहभागी भएर नेपालको हित र विकासका प्राथमिकताहरूबारे धारणा राख्नुहुनेछ। सेभिल शहरमा हुने उक्त महत्वपूर्ण सम्मेलनमा विश्वका विभिन्न मुलुकका सरकार प्रमुखहरू, अर्थमन्त्रीहरू तथा विकास साझेदारहरूको उल्लेख्य उपस्थिति रहनेछ।
सरकारी निकायहरूका अनुसार यो भ्रमणले नेपालको विकासका लागि वैदेशिक सहकार्य, वित्तीय स्रोत परिचालन र दिगो आर्थिक वृद्धिका क्षेत्रमा सहयोगी वातावरण निर्माण गर्न महत्वपूर्ण योगदान पुर्याउने अपेक्षा गरिएको छ।