काठमाडौंमा आजदेखि दुई दिने हिन्दुकुश हिमालय (एचकेएच) सांसद सम्मेलन २०२५ सुरु भएको छ। सम्मेलनले क्षेत्रीय वातावरण संरक्षण, जलवायु परिवर्तनको प्रभाव न्युनिकरण तथा दिगो विकासका विषयमा संसद सदस्यबीच संवाद र सहकार्यलाई प्रवर्द्धन गर्ने लक्ष्य राखेको छ।
कार्यक्रमको उद्घाटन गर्दै सहभागी वक्ताहरूले हिमालयन क्षेत्रको संवेदनशील पारिस्थितिकी तन्त्रलाई जोगाउन क्षेत्रीय तहमा साझा रणनीति आवश्यक रहेको बताएका छन्। जलवायु संकट, जलस्रोत व्यवस्थापन, ऊर्जा सहयोग र प्राकृतिक सम्पदाको संरक्षण सम्मेलनका प्रमुख एजेन्डा रहेका छन्।
यस सम्मेलनमा नेपालसहित विभिन्न हिमालयन मुलुकका सांसद, विज्ञ तथा सरोकारवालाहरूको सहभागिता रहेको छ। सहभागीहरूले आगामी दिनमा सहकार्य र साझा नीति निर्माणका लागि व्यावहारिक प्रस्ताव अघि सार्ने अपेक्षा गरिएको छ।