नेपालको बहुमूल्य धातु बजारमा आज सुनको मूल्य ऐतिहासिक रूपमा सर्वाधिक बिन्दुमा पुगेको छ। नेपाल सुन तथा चाँदी व्यवसायी महासंघका अनुसार सुनको मूल्य तोलामा रु. १,००० ले बढ्दै तोलाको खुद्रा मूल्य रु. १,९९,४०० पुगेको छ। यो मुल्य हालसम्मकै उच्च दर हो।
यसैगरी, चाँदीको मूल्यमा पनि वृद्धि भएको छ। आजको कारोबारमा चाँदी तोलामा रु. १० ले बढेर रु. २,३२५ मा पुगेको छ।
विशेषज्ञहरूका अनुसार अन्तर्राष्ट्रिय बजारमा सुनको मूल्यमा भइरहेको स्थायी वृद्धि, अमेरिकी डलरको विनिमय दरको उतारचढाव, र विश्वव्यापी आर्थिक अनिश्चितताले नेपाली बजारमा समेत प्रत्यक्ष प्रभाव पारेको हो। यसका साथै, भारत लगायतका छिमेकी मुलुकहरूमा माग बढ्नु पनि मूल्य वृद्धिको अर्को कारण मानिएको छ।
बढ्दो सुन र चाँदीको मूल्यले गहना खरिद गर्ने उपभोक्ता र विवाह–उत्सवका लागि तयारी गरिरहेका ग्राहकहरूलाई थप दबाब पारेको छ भने सुन–चाँदीमा लगानी गर्ने व्यवसायी र सञ्चायकका लागि यो लाभदायक अवसर बनेको छ।