प्रोटोनले बीवाइडी एटो–थ्री र ओमोडा ई–फाइभसँग प्रतिस्पर्धा गर्न नेपालमा नयाँ इलेक्ट्रिक एसयूभी इमास–सेभेन ल्याउन लागेको छ। यो एसयूभी केही दिनभित्रै नेपाली बजारमा उपलब्ध हुने अपेक्षा गरिएको छ।
इमास–सेभेन नेपाल ल्याउने निर्णय अहिलेको स्पोर्टी क्रसओभर एसयूभी सेग्मेन्टमा विद्युतीय गाडीहरूको माग बढिरहेका कारण गरिएको हो। प्रोटोनले हालै मलेशियामा पनि यो गाडीको बिक्री सुरु गरेको थियो।
यस गाडीलाई चीनको जिलीले बनाएको ग्यालेक्सी ई–फाइभ मोडेलमा प्रोटोनको लोगो राखेर नेपाली बजारका लागि तयार गरिएको हो। चीनमा उत्पादन भएको इमास–सेभेन नेपालमा आयात गरिनेछ। प्रोटोन ब्रान्डमा जिली ग्रुपको ५१ प्रतिशत लगानी रहेको छ, जसका कारण ग्यालेक्सी ई–फाइभलाई प्रोटोन इमास–सेभेनको रूपमा ल्याइएको हो। यो गाडी दक्षिण एसियाका राइट ह्याण्ड ड्राइभ भएका देशहरूमा पनि उपलब्ध हुनेछ।
मलेशियामा उपलब्ध इमास–सेभेनमा १६० किलोवाट क्षमताको फ्रन्ट ह्वील ड्राइभ मोटर छ, जसले ३२० न्यूटन मिटर पीक टर्क उत्पादन गर्न सक्छ। यसले शून्यदेखि १०० किलोमिटर प्रतिघन्टा स्पीड ६.९ सेकेन्डमा पुग्छ, भने यसको टप स्पीड १७५ किलोमिटर प्रतिघन्टा रहेको छ।
गाडीमा दुई भेरियन्टका ब्याट्री अप्सन उपलब्ध छन्: ४९.५२ किलोवाट आवर र ६०.२२ किलोवाट आवर, जसको रेन्ज क्रमशः ३४५ र ४१० किलोमिटर रहने डब्लूएलटीपी परीक्षणले पुष्टि गरेको छ। कम्पनीका अनुसार, यो ब्याट्रीलाई ९२१ पटक पूर्ण चार्ज र डिस्चार्ज गर्दा ९०.५ प्रतिशत ब्याट्री हेल्थ कायम राख्दै ४ लाख किलोमिटरसम्म चलाउन सकिनेछ।
इमास–सेभेनले अत्याधुनिक सुविधाहरू प्रदान गर्दछ, जस्तै:
- टु स्पोक स्टेरिङ ह्वील
- १०.२ इन्च एलसीडी इन्ट्रुमेन्ट क्लष्टर
- १५.४ इन्च सेन्टर इन्फोटेनमेन्ट स्क्रिन
- १३.८ इन्चको हेडअप डिस्प्ले
- वायरलेस फोन चार्जर
- पानोरामिक सनरुफ
- पावर टेलगेट
- २५६ कलरको एम्बीयन्ट लाइट
- १६ वटा स्पिकर
- लेभल २ एडास फिचर।
गाडीको लम्बाइ ४६१५ एमएम, चौडाइ १९०१ एमएम, उचाइ १६७० एमएम र ह्वीलबेस २७५० एमएम छ। यसमा १७३ एमएमको ग्राउन्ड क्लियरेन्स पनि उपलब्ध छ।
मलेशियामा यसको मूल्य २३ हजारदेखि २७ हजार अमेरिकी डलर तोकिएको छ। नेपाली बजारमा यसको मूल्य ५७ लाखदेखि ६५ लाख रुपैयाँबीच हुने अनुमान गरिएको छ, जुन ओमोडा ई–फाइभ र बीवाइडी एटो–थ्रीको मूल्यसँग मिल्दोजुल्दो छ।